aðildarumsókn að Evrópusambandinu.

Hæstv. forseti. Ég ætla að láta þessi síðustu ummæli hæstv. forseta fram hjá mér fara og læt sem þau hafi ekki verið sögð. Ég heyrði ekki betur en forseti væri að blanda sér í umræður með einhverjum hætti. En látum það vera. Þetta er allt hið einkennilegasta mál.

Fyrir liggur að af einhverjum ástæðum er lagt ofurkapp á að flýta umræðunni um þetta tiltekna mál. En það hefur ekki verið upplýst í þinginu með viðhlítandi hætti hvers vegna svo er. Hins vegar get ég getið þess þingmönnum til upplýsingar að í útvarpsfréttum núna klukkan sex upplýsti hæstv. forsætisráðherra um það hvers vegna liggi á. Hæstv. forsætisráðherra sagði nefnilega í viðtali við fréttamann Ríkisútvarpsins að Samfylkingin legði mikið kapp á að koma umsókn út þannig að hægt væri að taka hana fyrir á ráðherrafundi 27. júlí. (Gripið fram í.) Samfylkingin, hæstv. forsætisráðherra sagði Samfylkingin, (Forseti hringir.) ekki stjórnarflokkarnir, ekki ríkisstjórnin, Samfylkingin. (Forseti hringir.) Þetta eru skilaboð til Vinstri hreyfingarinnar – græns framboðs.