brottvísun hælisleitenda.

Frú forseti. Hæstv. ráðherra svaraði eiginlega engum af þeim spurningum sem ég lagði fyrir. Var hæstv. ráðherra meðvitaður um að Noor sem er um tvítugt hefði verið settur beint út á götu með enga peninga í Aþenu? Hann hefur enga pappíra til að sanna hver hann er, hann getur ekki tekið á móti fjárframlögum frá Íslandi, hann getur ekki skipt peningunum sínum, hann er á götunni og á það á hættu að vera handtekinn af óeirðalögreglu í hvert skipti sem hann labbar um göturnar í Aþenu. Hann á það líka á hættu að vera sendur aftur til Íraks.

Hann mætti á skrifstofu útlendingaeftirlitsins í Grikklandi og þar voru fleiri hundruð manneskjur þannig að hann gat ekki fengið sín mál afgreidd og mun sennilega ekki fá það á næstunni þannig að hann lifir í stöðugum ótta. Hefði ekki verið í lagi að leyfa honum að vera hér í 15 daga á meðan áfrýjað var?