meðferð sakamála.

Virðulegi forseti. Ég mæli fyrir frumvarpi til laga um breytingu á lögum um meðferð sakamála. Í frumvarpinu er lagt til að frestað verði fram til 1. janúar 2012 að setja á fót embætti héraðssaksóknara.

Þann 1. janúar í ár tóku gildi ný lög um meðferð sakamála, nr. 88/2008, er leystu af hólmi lög um meðferð opinberra mála frá 1991. Í hinum nýju lögum er m.a. mælt fyrir um að sett skuli á fót embætti héraðssaksóknara er vera skal nýtt stjórnsýslustig innan ákæruvaldsins. Í kostnaðarmati því sem fylgdi frumvarpinu kemur fram að ef frumvarpið verði að lögum leiði það til 62 millj. kr. hækkunar rekstrarkostnaðar á þessu sviði dómsmálaráðuneytisins. Einnig var gert ráð fyrir að við stofnun embættisins félli til tímabundinn stofnkostnaður sem næmi um 10 millj. kr. Gerði kostnaðarumsögnin þannig ráð fyrir því að viðbótarútgjöld á ársgrundvelli næmu um 72 millj. kr. Vegna sparnaðaraðgerða á útgjöldum ríkisins fyrir árið 2009 var því frestað fram til 1. janúar 2010 að setja embættið á fót. Í frumvarpi til fjárlaga fyrir árið 2010 er ekki gert ráð fyrir neinum framlögum til embættis héraðssaksóknara. Er því ljóst að enn um sinn verður að fresta því að setja embættið á fót og er lagt til að því verði frestað um tvö ár, þ.e. fram til 1. janúar 2012.

Virðulegi forseti. Hér er ekki lagt til að ákvæði um héraðssaksóknara verði felld úr gildi. Markmið þess að setja á fót þetta embætti var einkum að auka réttaröryggi með því að bæta stjórnsýslustigi við ákæruvaldið. Horfir það til aukinna réttinda borgaranna með því að þá aukast tækifæri til að kæra til æðra stjórnsýslustigs ákvarðanir sem tengjast saksókn. Því er lagt til að gildistökunni verði frestað um sinn í stað þess að ákvæði verði felld niður.

Virðulegi forseti. Ég legg til að frumvarpinu verði að lokinni þessari umræðu vísað til hv. allsherjarnefndar og 2. umr.