2. umr. um Icesave og kvöldfundur.
Virðulegi forseti. Ég tek undir ummæli hv. þm. Birgis Ármannssonar og tel að þetta sé hið alvarlegasta mál.
Ég vildi líka nefna annað varðandi fundarstjórn forseta. Það var samþykkt naumlega í atkvæðagreiðslu áðan að hafa kvöldfund og ég vildi spyrja hæstv. forseta hvort hún geti upplýst þingheim um hversu lengi er áætlað að þingfundur muni standa. Ég vek athygli hæstv. forseta á því að á morgun og á mánudaginn eru kjördæmadagar og fyrir marga þingmenn er um langan veg að fara. Vegna þess að það hefur legið fyrir í starfsáætlun þingsins um langa hríð að nú séu kjördæmadagar hafa margir þingmenn, sérstaklega úti á landsbyggðinni, skipulagt fundi jafnvel í kvöld. Þess vegna er mjög óþægilegt að fara inn í þessa umræðu ekki vitandi hvenær henni muni ljúka. Við þurfum jú að sinna okkar skyldum í kjördæmunum. Ég óska eftir að hæstv. forseti (Forseti hringir.) upplýsi okkur um þetta.