fullgilding mansalsbókunar við Palermó-samninginn.

Frú forseti. Ég mæli fyrir nefndaráliti um tillögu til þingsályktunar um fullgildingu mansalsbókunar við Palermó-samninginn.

Með þessari tillögu er leitað heimildar Alþingis til að fullgilda fyrir Íslands hönd bókun um að koma í veg fyrir, uppræta og refsa fyrir mansal, einkum kvenna og barna, sem er viðbót við samning Sameinuðu þjóðanna gegn fjölþjóðlegri, skipulagðri glæpastarfsemi og samþykkt var á allsherjarþingi Sameinuðu þjóðanna í New York 15. nóvember 2000.

Markmið þessarar bókunar er að berjast gegn mansali, einkum verslun með konur og börn, og aðstoða og vernda fórnarlömb mansals og að stuðla að samstarfi aðildarríkja til að ná fyrrgreindum markmiðum. Í þessu skyni skilgreinir bókunin hugtakið mansal, leggur til leiðir til að efla löggæslu og landamæraeftirlit, styrkir dómskerfið, eykur vernd og stuðning við fórnarlömb og vitni og kemur á forvarnastefnu.

Nefndin hefur kynnt sér þær lagabreytingar sem gerðar hafa verið í samræmi við bókunina. Við breytingu á almennum hegningarlögum með lögum nr. 40/2003 var m.a. tekið mið af bókuninni þegar nýrri grein var bætt við hegningarlögin sem gerði mansal refsivert. Frekari breytingar á ákvæðum almennra hegningarlaga voru gerðar með lögum nr. 149/2009 til þess að Ísland geti staðið við þær skuldbindingar sem bókunin leggur aðildarríkjum á herðar. Með þessum breytingum telur nefndin að nauðsynlegar lagabreytingar séu komnar fram fyrir fullgildingu bókunarinnar.

Nefndin vekur þó athygli á athugasemdum sem bárust frá Mannréttindaskrifstofu Íslands þess efnis að í lögum nr. 149/2009 séu ákvæði um að refsivert sé að hagnýta sér bága stöðu einstaklinga sem verða fórnarlömb mansals án þess að skilgreint sé nánar hvað í slíkri stöðu felst og geti það leitt til of þröngrar túlkunar á ákvæðinu.

Nefndin hefur fjallað um þetta mál og fékk á sinn fund Grétu Gunnarsdóttur, Sigríði Eysteinsdóttur og Ingibjörgu Davíðsdóttur frá utanríkisráðuneyti og Guðlaugu Jónasdóttur frá dómsmála- og mannréttindaráðuneyti. Einnig bárust nefndinni umsagnir frá Kvenréttindafélagi Íslands og Mannréttindaskrifstofu Íslands.

Ég vil undirstrika að hér er á ferðinni mjög mikilvægt mál og réttarbót ef þessi mansalsbókun við Palermó-samninginn verður fullgilt hér á landi.

Nefndin leggur til að tillagan verði samþykkt óbreytt.

Undir nefndarálitið rita Árni Þór Sigurðsson, Valgerður Bjarnadóttir, Birgitta Jónsdóttir, Bjarni Benediktsson, Helgi Hjörvar, Ragnheiður E. Árnadóttir og Þórunn Sveinbjarnardóttir.