staða heimilanna.

Virðulegi forseti. Eitt af því sem óvissa er um varðar stöðu skuldugra heimila, þ.e. hvernig gengistryggðu lánunum sem nú eru fyrir dómstólunum reiðir af. Við munum væntanlega fá niðurstöðu í það mál fljótlega. Væntanlega verður kveðinn upp dómur innan tíðar í því efni sem skiptir verulegu máli fyrir heimilin í landinu og fyrir stöðu þjóðarbúsins líka.

Varðandi Alþjóðagjaldeyrissjóðinn, virðulegi forseti, hafa stjórnarliðar og stjórnarandstaða staðið saman í hvernig taka eigi á því og hafa gert um nokkurra mánaða skeið. Mjög nauðsynlegt er að fá lyktir í það mál og vonandi verður það. Samningaviðræður eru í gangi núna og ríkisstjórnin fór síðast í morgun yfir stöðu málsins. Það er full ástæða til að ætla að við fáum líka niðurstöðu í það mál fljótlega. Það skiptir verulegu máli. Það er alveg ljóst að gjaldeyrisforði þjóðarinnar hefur styrkst verulega á umliðnum mánuðum. Það getur farið svo að við endurskoðum hvort við þurfum á öllum þeim lánum að halda sem fyrirhuguð voru í samningunum við Alþjóðagjaldeyrissjóðinn. Við þurfum að fara yfir það. Það sem skiptir kannski mestu er að það stefnir í að á árinu 2011 getum við lokið samskiptum okkar við Alþjóðagjaldeyrissjóðinn sem hafa verið með ágætum og ég tel að hafi hjálpað okkur verulega úr þeim vanda sem við höfum verið í og hefur flest gengið eftir.