fjármál stjórnmálasamtaka og frambjóðenda.
Frú forseti. Ég er sammála hv. flutningsmanni þessa nefndarálits um það að hér er verið að stíga skref í rétta átt. Þetta er hænuskref og þegar hægt er að stökkva yfir lækinn í heilu lagi er ég meira gefin fyrir það.
Í 8. bindi skýrslu rannsóknarnefndar Alþingis segir, með leyfi forseta:
„Eitt augljósasta tæki viðskiptalífsins til þess að hafa áhrif á stjórnmálamenn eru bein fjárframlög, bæði til stjórnmálasamtaka og einstakra stjórnmálamanna.“
Svo segir síðar, með leyfi forseta:
„Leita þarf leiða til þess að draga skýrari mörk á milli fjármálalífs og stjórnmálamanna. Ekki er líðandi að gæslumenn almannahagsmuna gangi erinda einkafyrirtækja með þeim hætti sem gert var í aðdraganda bankahrunsins.“
Nú getum við kannski verið sammála um það að samfélag okkar hefur færst í rétta átt frá því fyrir hrun en ég vil spyrja hv. þingmann: Hefði ekki verið rétt að bíða eftir niðurstöðu þingmannanefndar og áliti þingmannanefndar á þessu og þeim leiðbeiningum sem þar eiga að koma fram áður en við afgreiðum þetta mikilvæga frumvarp?