málshöfðun gegn ráðherrum.

Virðulegi forseti. Það eru nokkuð skrýtnar sendingar sem hér koma fram. Það liggur fyrir að þingmannanefndin skrifaði sérstaka skýrslu sem ég held að allir þingmenn hafi mært. Rauði þráðurinn í þeirri skýrslu var að menn þyrftu að vanda sig meira, fara betur yfir hlutina og hlusta betur á röksemdir og málflutning annarra.

Er það það sem menn ætla leggja upp með núna? Ég vona það. Fyrir þá sem ekki þekkja til bendi ég á að þegar við sjálfstæðismenn leggjum til að mál séu rædd í nefndum eru ekki allir í þeirri nefnd sem mun fjalla um þetta mál. Mæla menn gegn því að við notum þá tímann í öðrum nefndum og förum yfir þau mál sem brenna á þjóðinni? Er það það sem menn gagnrýna hér? Þar skilur í það minnsta á milli okkar sjálfstæðismanna og þeirra sem gagnrýna okkur fyrir það, svo því sé algerlega til haga haldið. Við teljum að við eigum að nota tækifærið og vinna fyrir þjóðina.