samningar um ábyrgð á endurgreiðslu Tryggingarsjóðs innstæðueigenda til breska og hollenska ríkisins.
Frú forseti. Ég held að það hefði verið fullt tilefni til, og sé enn, að gera athugasemdir við framgöngu þessarar stofnunar eins og annarra sem hafa tekið þátt í því að reyna að kúga Íslendinga í þessu máli enda er hér komin staðfesting á því að notuð voru önnur og ótengd mál til að þvinga fram niðurstöðu. Niðurstaða Íslendinga í viðræðum við Breta og Hollendinga hefur ekkert með einhverja kröfuhafa að gera, einhverja stóra erlenda banka sem hafa kvartað til ESA undan mismunun. Það að þau gefi í skyn þar á bæ, hjá ESA, að Íslendingar fái einhvers konar sakaruppgjöf með því að fallast á þessar kröfur er beinlínis órökrétt og sýnir hvernig þessi stofnun hefur verið notuð. Raunar hafa verið færð fyrir því rök, m.a. af norska lagaprófessornum Peter Ørebech, að Íslendingar megi ekki í tvíhliða viðræðum við Breta og Hollendinga sópa þessu máli undir teppið vegna þess að það varði fleiri en þá. Það var áhugavert að heyra álit hæstv. ráðherra á þessu. Höfum við heimild til að afgreiða þetta mál í einhverjum hliðarherbergjum með Bretum og Hollendingum einum þegar þetta varðar allt regluverk Evrópusambandsins og hina ýmsu kröfuhafa þar að auki?
