samningar um ábyrgð á endurgreiðslu Tryggingasjóðs innstæðueigenda til breska og hollenska ríkisins.
Virðulegi forseti. Það er gott að heyra að hæstv. forsætisráðherra ber fyrir sig sjálfstæði þingsins og ég ætla að leyfa mér að rifja upp þessi ummæli ef í hart fer vegna þess að það hefur verið dálítil lenska í þessu máli, og sporin hræða, að það hefur verið kallað eftir ákveðnum hlutum frá ákveðnum húsum úti í bæ.
Önnur spurning sem ég vil bera fram við hæstv. forsætisráðherra varðar mögulega þjóðaratkvæðagreiðslu. Hvernig mundi hæstv. forsætisráðherra líta á þann möguleika? Þá er ég ekki að vísa til þess að forseti Íslands mundi vísa þessu samkvæmt 26. gr. stjórnarskrárinnar í þjóðaratkvæðagreiðslu, heldur ef þingið mundi sjálft ákveða þegar og ef þetta frumvarp yrði samþykkt að vísa því til þjóðarinnar. Það er kallað mikið eftir því, þjóðinni finnst hún eiga mikið í þessum samningi eftir synjun hennar í þjóðaratkvæðagreiðslu og ég spyr hæstv. forsætisráðherra að þessu, sérstaklega í ljósi þeirra ummæla sem hún hefur sjálf viðhaft gegnum tíðina um nauðsyn þess að (Forseti hringir.) þjóðin fái að eiga síðasta orðið.
Rétt í lokin, frú forseti, vil ég spyrja hæstv. forsætisráðherra hvort hún hafi einhvern tíma íhugað afsögn út af þessu máli.