vörugjald af ökutækjum, eldsneyti o.fl.

Frú forseti. Það er ástæða til að fagna þessu frumvarpi. Stjórnvöld geta svo sannarlega ráðið nokkru um samsetningu bílaflotans með skattlagningu og þar með hvernig við skilum hlut okkar inn í kolefnisbókhaldið, inn í bókhald sem við höfum skuldbundið okkur til að breyta á þann veg að draga úr losun gróðurhúsalofttegunda í þeim tilgangi að reyna að bæta loftgæðin á jörðinni allri.

Það hefur vissulega verið mikil vinna í kringum þetta mál árum saman og einnig núna í hv. efnahags- og skattanefnd en ég tek undir hamingjuóskir til okkar allra. Þetta er fyrsta skrefið í því að breyta bílaflota þjóðarinnar, sem á flesta bíla á mann, í þá átt að hann losi minna af gróðurhúsalofttegundum.