skýrsla forseta um öryggismál tölvukerfis Alþingis.
Frú forseti. Ég vil þakka hæstv. forseta fyrir þá yfirlýsingu sem hún gaf um ferli þessa máls og ég tek það fram að ég tel að málið sé nú í réttum farvegi. Ég tel jafnframt að málið hefði átt að fara í þann farveg í febrúar 2010. Það er alveg ljóst að við þurfum að huga að öryggismálum hér. Rætt hefur verið um aðgang að húsnæðinu Austurstræti 8–10. Það er þannig að inn í það húsnæði fer enginn nema með því að nota það aðgangskort sem þingmenn hafa og aðrir starfsmenn á því sviði eða að tala við vaktmann til að hleypa sér inn. Það átti við áður en millihurðin var sett upp. Þeir sem eru í Austurstræti 8–10 eru því þingmenn, starfsmenn þingsins og þeir sem þingmenn bjóða í það hús hvort heldur er til nefndarfunda á nefndasviði eða í þingflokksherbergjum sínum eða á þeim skrifstofum eða fundarsölum sem í húsinu eru. Aðrir komast ekki þarna inn. Það er alveg ljóst, hvort sem okkur líkar það betur eða verr, að inn í þetta hús fer enginn nema í gegnum einhvern annan, aðgangskortið eða að tala við vaktmann. Þannig er það, þannig hefur það verið og því þarf að skoða það. Þess vegna þarf að fara fram rannsókn á þessu máli aftur. Við sitjum ekki uppi með það að einhver hafi sagt einhverjum eitthvað eða einhver hafi gert eitthvað, það þarf að fara ofan í saumana (Forseti hringir.) á þessu máli aftur, endurtaka lögreglurannsóknina og bregðast við í ljósi þess sem þá kemur út.