fullgilding Árósasamningsins.

Virðulegi forseti. Sem mesta kerfishleðslu? Í dag starfa í íslensku bönkunum tugir doktora með mikla kerfishleðslu innan borðs, mikla menntun, vænlegar fjaðrir úr dýrustu skólum landsins, en ekki skila þeir okkur þeim árangri sem við væntum. Sem mest kerfishleðsla er einfaldlega það sem þingmaðurinn boðar að eigi að keyra yfir allt draslið, bara keyra yfir það, engan moðreyk, engar uppbrettar ermar heldur bara slifsi og fínheit, bindi og slæður og sluffur og Brussel-strápils með glimmeri. Það er framtíðin. Ég óska hv. þingmanni góðrar ferðar í það partí en verð því miður að afþakka samfylgdina.

Það er betra að byggja upp, sagði hv. þingmaður, með hyggjuviti, reynslu og menntun. Þar erum við þó sammála því að hyggjuvit er ekkert annað en brjóstvit með blandi af reynslu og reynslan er verksvit. Ef hv. þingmaður hefur ekki pláss til að slípa þessi orð inn í ljóð í hjarta sínu er sjálfsagt að reyna að liðka til um það á einhvern hátt að auka þann skilning með námskeiði og í kerfishleðslubatteríi. (Forseti hringir.) Við skulum ekki gleyma að hafa hlutina eins einfalda og hægt er. (Forseti hringir.) Það er Ísland, þess vegna erum við Íslendingar.