Stjórnarráð Íslands.
Frú forseti. Ég þakka hv. þingmanni fyrir um margt ágæta ræðu og málefnalega. Hún fór vel yfir þetta frumvarp og hvað hún teldi betur mega fara. Eins kom hún inn á ýmislegt sem þingmannanefndin sem fór yfir rannsóknarskýrsluna skilaði frá sér. Af því að hv. þingmaður átti sæti í þeirri nefnd vil ég nefna að þingmannanefndin fór mjög ítarlega yfir málið og fjallaði meðal annars um áfellisdóm yfir íslenskri stjórnsýslu, verklagi hennar og skorti á formfestu, jafnt í ráðuneytum sem sjálfstæðum stofnunum og fleira í þeim dúr.
Hv. þm. Ragnheiður Ríkharðsdóttir nefndi hér ákveðna þætti, eins og að opna fundargerðir ríkisstjórnarinnar og fleiri þætti sem þyrfti að fara lengra með í þessu frumvarpi en gert er og heldur en komið hefur fram. Hv. þingmaður komst svo að orði að heilt yfir hefði þingmannanefndin bent á að það þyrfti meiri valddreifingu, meira gegnsæi o.s.frv. Hvernig finnst hv. þingmanni ganga að vinna úr niðurstöðum þingmannanefndarinnar? Erum við á þeim stað sem hv. þingmaður bjóst við að við yrðum á á þessum tímapunkti? Erum við kannski ekki komin nægilega langt? Hvað finnst hv. þingmanni að betur mætti fara? Er þetta frumvarp nægilega mikið skref í þá átt sem þingmannanefndin komst að í skýrslu sinni?
