ávísuð lyf til fíkla.

Hæstv. forseti. Ég vil þakka hæstv. velferðarráðherra fyrir þetta svar um leið og ég brýni hann til aðgerða hvað þetta varðar. Ég mun líka óska eftir því að þetta verði rætt í heilbrigðisnefnd og landlæknir og aðrir kallaðir þar til. Þetta var rætt lítils háttar í síðustu viku undir öðrum lið og þá kom í ljós að hægt er að grípa til aðgerða strax.

Hæstv. velferðarráðherra vitnar hér í lyfjagrunninn sem er frá 2003. Þar var eftirlit með ávísun lyfja til fíkla hert. En það er þannig með þann lyfjagrunn að hann uppfærist aðeins á tveggja vikna fresti. Fyrrverandi landlæknir hefur sagt að fara þurfi yfir hverja einustu lyfjaávísun á hverjum degi og skoða hvort margir læknar eru að skrifa út til sama einstaklings — það þurfum við að gera daglega — og vitnar hann til annarra landa á Norðurlöndum og sérstaklega Danmerkur.

Virðulegi forseti. (Forseti hringir.) „Fyrsta skref í átt að bata er að viðurkenna vanmátt okkar og leita nýrra leiða. Kerfið virkar ekki sem skyldi og nú er kominn tími til breytinga“, sagði Ingibjörg Dögg Kjartansdóttir blaðamaður í leiðara DV í dag. Ég held að við eigum að gera þau skrif og baráttu Jóhannesar Kr. Kristjánssonar blaðamanns að okkar og hefjast handa (Forseti hringir.) sem fyrst og kippa þessum málum í liðinn.