stjórn fiskveiða.
Herra forseti. Mig langar til að ræða pínulítið betur við hv. þingmann einmitt um þetta atriði, 32. gr. Í síðara frumvarpinu, sem sumir kalla samfylkingarfrumvarpið, stendur og ég ætla að lesa það enn einu sinni, með leyfi forseta:
„Lög þessi öðlast þegar gildi, en jafnframt falla úr gildi lög nr. 116/2006, með síðari breytingum. Lög þessi skulu hafa gildi í 23 ár frá gildistöku þeirra.“
Nú er það svo að við erum búin að ræða í 660 ræðum í 22 tíma um fyrra frumvarpið. Seinna frumvarpið, ef það verður samþykkt, tekur fyrra frumvarpið úr gildi. Svo er annað, þessi 23 ár, það væri skemmtilegt að fá einhverja smávitneskju um hvaðan í ósköpunum þetta kemur en ég fullyrði og það er mín skoðun að þetta hefur ekkert gildi, ekki neitt, vegna þess að í stjórnarskránni stendur í 2. gr.:
„Alþingi og forseti Íslands fara saman með löggjafarvaldið.“
Eitt Alþingi (Forseti hringir.) getur ekki afnumið löggjafarvald seinna Alþingis.