hlutfall skatta og gjalda til ríkissjóðs af útsöluverði bensíns og dísilolíu.
Hæstv. forseti. Ég vildi beina tveimur eða þremur spurningum til hæstv. fjármálaráðherra. Annars vegar um hvort ekki sé rétt munað hjá mér að við fjárlagagerðina hafi verið reiknað með að umferð ykist um 2%. Hið gagnstæða hefur orðið raunin, umferð hefur minnkað verulega, milli 5 og 10% víða á vegum. Væntanlega spilar þar skattlagning á eldsneyti mjög stóra rullu en auðvitað önnur skattlagning og krappari kjör almennings líka.
Hins vegar vil ég spyrja hæstv. fjármálaráðherra um þá krónutölu sem skilar sér í ríkiskassann, hvort í áætlunum fjármálaráðuneytisins hafi verið gert ráð fyrir eldsneytisverði í þessum hæðum, 260 eða 270 kr., eða hvort gert hafi verið ráð fyrir öðrum upphæðum og þar af leiðandi öðrum upphæðum í ríkiskassann. (Forseti hringir.) Er ekki verið að taka inn óþarflega mikið fé á þessum lið?