ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.
Frú forseti. Þessi eina mínúta dugar skammt til þess að ræða efnislega um frumvarpið en ég er að gera tilraun til þess með því að fara í andsvör vegna þess að þetta hefur ekkert verið rætt efnislega.
Mig langar til að spyrja hv. þingmann um auðlind, hvernig hann skilur auðlind í náttúru Íslands. Til dæmis rafsegulbylgjur og tíðnisvið þeirra sem er að verða mikil auðlind og verður gífurleg auðlind í framtíðinni, fellur það undir þetta ákvæði? Og hver á það þá? Er það strax í byrjun eign ríkisins, ekki þjóðarinnar? Hv. þingmaður nefndi bújarðir, grasið og annað slíkt, er einhvers staðar til auðlind sem ekki er búin til af mannauði?
Sjávarútvegurinn kostaði mannslíf á hverju einasta ári. Það var ekki fyrr en mannauðurinn gerði skipin svona örugg. Fallvötnin voru til bölvunar í hverri sveit. Það var ekki fyrr en mannauðurinn gerði þau að auðlind. Er ekki í rauninni á bak við allar þessar auðlindir mannauðurinn sem við erum því miður (Forseti hringir.) að flytja út núna?