orð þingmanns um vinnubrögð ríkisstjórnarinnar.

Virðulegi forseti. Manni er hálfbrugðið yfir þessum hörðu dómum yfir fyrrverandi samstarfsráðherra úr ríkisstjórn og ekki að undra að hv. þm. Jón Bjarnason skuli kalla fram í að hæstv. forsætisráðherra fari með rangt mál. Að minnsta kosti er mjög mikill munur á frásögn hæstv. forsætisráðherra og því sem fram kom í ræðu hv. þingmanns í gær.

Yfirlýsing hæstv. forsætisráðherra um að hún hafi ekki viljað hlýða á ræðu hv. þingmanns í gær, hlíft sér við því eins og hún orðaði það, hlýtur að vera einsdæmi í vanvirðingu forsætisráðherra við Alþingi. Þær fullyrðingar að hv. þm. Jón Bjarnason hafi dregið frumvarpið og sé helsta ástæðan fyrir því hversu hægt sjávarútvegsmál hafi gengið hjá ríkisstjórninni gengur líka í berhögg við það sem fram kom í ræðu hv. þingmanns í gær þar sem hann gerði (Forseti hringir.) grein fyrir því að hæstv. núverandi sjávarútvegs- og landbúnaðarráðherra hefði í raun tekið sér lengri tíma í að vinna frumvarpið sem nú er til umræðu í þinginu en fyrirrennari hans, hv. þm. Jón Bjarnason.