frávik vegna styrkja úr sjóði er fjármagnar aðstoð við umsóknarríki Evrópusambandsins.

Frú forseti. Já, það er hárrétt hjá hv. þingmanni að skilin eru mjög óljós þegar um slík samstarfsverkefni er að ræða.

Hv. þingmaður kom líka inn á til hvers ætti að nota þá styrki. Við höfum lýst því yfir að við séum ekki í aðlögunarferli heldur í umsóknarferli en samt tökum við við aðlögunarstyrkjum. Embættismenn sem skrifuðu skýrslu hæstv. utanríkisráðherra vissu að það þýddi ekkert fyrir þá að vera að segja eitthvað annað en sannleikann í þeim efnum. Ég vitna í skýrslu utanríkisráðherra á bls. 35 þar sem hann segir um IPA-styrkina að landsáætlanir skuli gerðar fyrir árin 2011, 2012 og 2013. IPA-styrkirnir verða veittir til að undirbúa þátttöku í stoðkerfissjóðum árið 2012 og til uppbyggingar stofnana árið 2013. Þar eru menn alveg með það á hreinu að IPA-styrkirnir eru til þess að laga bæði stjórnsýslu og stofnanir Íslendinga að Evrópusambandinu.

Hins vegar stöndum við frammi fyrir því á þingi að ákveðnir pólitískir aðilar hafna því og reyna enn að beita þeim blekkingum að þetta séu ekki aðlögunarstyrkir. Ég vil því enn spyrja hv. þingmann: Hvernig var kynningin — ég veit ekki hvort hv. þingmaður er í efnahags- og viðskiptanefnd (Gripið fram í.) en hv. þingmaður er mjög kunnugur í þessu. (Forseti hringir.) Hér stendur klárlega að IPA-styrkirnir séu ætlaðir til aðlögunarverkefna og til að undirbúa umsóknarlandið til að yfirtaka regluverk Evrópusambandsins.