vernd og orkunýting landsvæða.
Frú forseti. Ég þakka hv. þingmanni fyrir þessa afar athyglisverðu ræðu og tek undir með hv. þingmanni að það væri óskandi að við bærum gæfu til þess á Alþingi að fara einmitt eftir vinnu verkefnisstjórnarinnar sem var byggð á þessum faglega grunni. Það er mjög dapurlegt að fylgjast með því ítrekað hvernig vikið er út frá því á Alþingi. Þegar hægt er að ná breiðri sátt um hin einstöku mál er ítrekað verið að víkja út frá því og í rauninni virðist ekki vera vilji til þess að ná breiðri sátt. Í þessum málaflokki er gríðarlega mikilvægt að orkumál þar sem menn eru búnir að teygja sig úr báðum áttum séu unnin í sátt.
Hv. þingmaður kom inn á ákveðin verkefni sem væri búið að taka út og það kom líka fram í andsvörum að það væri búið gera ákveðnar breytingar. Það kom fram í umsögnum um þetta mál að þær breytingar sem búið er að gera geri það að verkum að þjóðarbúið verði af 270 milljörðum og að gert sé ráð fyrir því að á næstu fjórum árum verði 4–6% minni hagvöxtur og að atvinnulífið verði af 5 þús. störfum.
Það kom fram í máli hv. þm. Magnúsar Orra Schrams og fleiri stjórnarþingmanna að þeir meti það svo að fjárfestingaráætlun ríkisstjórnarinnar muni skila þessum hagvexti. Hvað vill hv. þingmaður segja um þetta mál í samræmi við fjárlagafrumvarpið þar sem einmitt var talað um að við værum að ráðast í of mikil útgjöld miðað við það sem væri að gerast á hinni hlið ríkisfjármálanna, þ.e. í hagvexti, verðmætasköpun og öðru því um líku? Deilir hv. þingmaður þeim áhyggjum ekki með þeim sem hér stendur að með því að taka þessi verkefni út séum við í rauninni að kippa stoðunum undan möguleika þess meðal annars að veita fjármuni inn í heilbrigðiskerfið og velferðarþjónustuna? Eða er hv. þingmaður sammála því að fjárfestingaráætlun ríkisstjórnarinnar muni skapa hér 4–6% (Forseti hringir.) hagvöxt, 5 þús. störf og 270 (Gripið fram í.) milljarða?