þingleg meðferð skýrslu um ESB.
Virðulegi forseti. Það er mikilvægt að það sé skýrt hvernig með þessa skýrslu verði farið. Ég skil hv. þm. Birgi Ármannsson þannig að málið fari til efnislegrar meðferðar í utanríkismálanefnd í samræmi við orð forseta í gær. Ég óska eftir staðfestingu á því frá forseta eða frá formanni utanríkismálanefndar að til standi að vinna í skýrslunni þar, fá gesti og skila áliti til þingsins til upplýsingar fyrir okkur. Ég hef bent hér á að í þessa skýrslu vantar hluti sem skipta verulegu máli um hagsmunamat.
Ef ekki stendur til að hafa efnislega umræðu í utanríkismálanefnd um skýrsluna þykir mér liggja beint við að vísa skýrslunni ekki til utanríkismálanefndar heldur til stjórnskipunar- og eftirlitsnefndar og láta þá kalla hæstv. utanríkisráðherra fyrir þar og fá skýringar á þeirri misnotkun á almannafé sem felst í því að biðja um 25 millj. kr. skýrslu og vilja ekki láta gera neitt með hana á vettvangi þingsins.
Annaðhvort fer þessi skýrsla í utanríkismálanefnd (Forseti hringir.) til efnislegrar umræðu, til meðferðar, þar sem gestir (Forseti hringir.) koma í heimsókn, álit verður gefið og umræða verður síðan aftur í þingsal, (Forseti hringir.) eða hún fer í stjórnskipunar- og eftirlitsnefnd og þá á að kjöldraga hæstv. utanríkisráðherra fyrir þá misnotkun á almannafé að láta gera skýrslu sem hann vill ekki gera neitt með.