aðildarviðræður við Evrópusambandið.
Virðulegi forseti. Ég þakka hv. þingmanni ágæta ræðu. Hv. þingmaður nefndi að misjafnar ástæður væru fyrir því að fólk drægi hina eða þessa ályktunina, þ.e. um það hvort ganga ætti í Evrópusambandið eða ekki, það þyrftu ekki endilega að vera landbúnaðarmálin og sjávarútvegsmálin — sem kannski er mest talað um, kannski eðlilega, það eru stærstu málin og mikið hagsmunamál fyrir þjóðina — heldur jafnvel náttúrumál eða vinnuréttindamál eða eitthvað því um líkt.
En svona í ljósi þessara ummæla langar mig að spyrja hv. þingmann að tvennu: Annars vegar hvort hann telji landbúnaðarmálin og sjávarútvegsmálin vera mikilvægustu umræðuefnin? Í öðru lagi, burt séð frá því, hvaða önnur mál sem varða samningana hann telur hvað mikilvægust til þess að ná samningi sem þjóðin gæti sætt sig við?