umsókn Íslands um aðild að Evrópusambandinu dregin til baka.

Virðulegur forseti. Ég þakka fyrir spurninguna. Ég mundi kannski ekki segja að það væri engin leið að komast að því hvað væri í boði. Ég er á þeirri skoðun að vel sé hægt að átta sig á því hvað er í boði í Evrópusambandinu með því að kynna sér sáttmála þess, Lissabonsáttmálann sem hefur verið þýddur yfir á íslensku. Og fyrir þá sem hafa áhuga á því að sjá endanlegan samning að lesa skýrslu Hagfræðistofnunar sem lýsir því á hvaða stig samningarnir voru komnir og hvað væri í boði.

Varðandi aðkomu þjóðarinnar að ákvörðuninni held ég í sjálfu sér að ekki sé búið að útiloka það á nokkurn hátt að þjóðin muni eiga aðkomu að málinu. Það hefur hins vegar verið bent á ómöguleikann við að leggja ákveðna spurningu af ákveðinni tegund fyrir, en ekki er hægt að útiloka það í meðferð utanríkismálanefndar þar sem málið er til skoðunar að einhverjar breytingar verði og einhver þróun á því.