umsókn Íslands um aðild að Evrópusambandinu dregin til baka.
Hæstv. forseti. Hér fer fram efnisleg umræða um þingsályktunartillöguna um umsókn Íslands um aðild að Evrópusambandinu, mál sem er borið upp af utanríkisráðherra sem hefur mestan partinn setið hér í salnum og hlýtt á umræðuna. Líkt og tíðkast í umræðum hér á Alþingi þá er það sá ráðherra sem ber ábyrgð á máli sem reynir að sitja eins og hægt er yfir umræðunum. Ég kannast ekki við að það hafi alltaf verið þannig síðan ég tók sæti á þingi að allir ráðherrar sitji hér til að hlýða á allar umræður í öllum málum, ég kannast ekki við það.
En af því að menn tala um að þeir vilji greiða fyrir þingstörfum og séu tilbúnir að tala minna ef ákveðnir ráðherrar sitji í salnum vil ég einfaldlega benda á að þegar umræðunni lýkur fer málið í þingnefnd þar sem talað verður um það á þeim vettvangi sem ætlast er til að gert verði á milli umræðna í þinginu. Ég vil bara hvetja menn til að líta til þess. Hér liggur fyrir dagskrá þingsins með 28 málum þannig að ég held að við höfum alveg nóg að sýsla hér í þinginu.
