umsókn Íslands um aðild að Evrópusambandinu dregin til baka.

Virðulegi forseti. Nú ber svo við að allir ráðherrar eru farnir úr salnum aftur. Þetta eru svona skreppitúrar sem menn eiga hingað inn í þingsal til okkar hinna.

Ég verð að nefna það hér að við erum ekki að tala um að menn hafi í aðdraganda kosninga sagt eitthvað og einhver orð „fallið í hita leiksins“. Menn voru mjög staðfastir í því að segja það sama. Allir þessir ráðherrar sem vitnað hefur verið til sögðu það sama. Hvers vegna sögðu þeir það sama? Það er vegna þess að þetta var beinlínis í stefnuskrá Sjálfstæðisflokksins fyrir kosningar að haldin yrði þjóðaratkvæðagreiðsla á kjörtímabilinu hvorki meira né minna. Annaðhvort stunduðu menn vísvitandi stórfelldar blekkingar í aðdraganda kosninga, eða að hér er verið að grípa til mjög grunnra og mjög lélegra eftiráskýringa, vegna þess að það hefur enginn (Forseti hringir.) skynsamleg skýring, engin sem hald er í komið fram um það hvers vegna þessi stefnubreyting er orðin. Því ítreka ég það að þessir (Forseti hringir.) ráðherrar komi hingað í salinn og eigi við okkur samtal um þetta og skýri þetta út fyrir okkur.