séreignarsparnaður og ráðstöfun hans til greiðslu húsnæðislána og húsnæðissparnaðar.

Hæstv. forseti. Það er nákvæmlega þetta, ef menn túlka það þannig að 100 þúsund heimili nýti sér þetta, þá mun væntanlega stór hópur nýta sér að safna fyrir kaupum á húsnæði. Þá kem ég að því sem hefur komið mér á óvart í umræðunni og líka í lausnunum í heild.

Menn hafa talað mjög fjálglega um leigjendamarkað. Við í fyrri ríkisstjórn höfðum þá stefnu að jafna ætti stöðu leigjenda og kaupenda á húsnæðismarkaði, en í raunveruleikanum er hér verið að hvetja fólk sérstaklega til að safna til kaupa. Menn geta sagt: Í framtíðinni á að koma eitthvað annað. Hvenær? Hvenær kemur það fyrir þann sem velur að vera á leigjendamarkaði? Það er akkúrat það sem er að gerast að hluta, menn eru að velja leiguformið sem búsetuform frekar en eignaformið. Hæstv. ríkisstjórn hefur talað fyrir því í öðru orðinu, en er ekki mótsögn í því sem hún er í reynd að gera með þessum tillögum og einnig tillögunum sem verða hér til umfjöllunar á morgun?