verslun með áfengi og tóbak o.fl.
Herra forseti. Ég vil taka fram, hvað sem ég kann að hafa sagt áður, að ég efast ekki eitt augnablik um að hv. þm. Willum Þór Þórsson vill vel í þessum efnum, jafn mikið og hann hefur komið að æskulýðs-, íþrótta- og menntamálum. En okkur getur samt greint á um þessi efni og ekkert að því. Ég ætla þá líka að vera hreinskilinn og segja: Ég hef séð hv. þingmann í betri félagsskap en hann er í með hópi flutningsmanna frumvarpsins, þ.e. í þessum efnislega og yfirfærða skilningi. Mér finnst ekki skynsamlegt að fara inn á þessa braut.
Mun vöruúrvalið ekki verða í boði í einhverjum sérverslunum? Jú, það er líklegt að það yrði á höfuðborgarsvæðinu, trúlega spryttu þar upp stórar búðir með miklu vöruúrvali. Það færi sjálfsagt eftir verðflokkum, ég geri ráð fyrir að Bónus yrði frekar með ódýrt kassavín og hefði það við hliðina á kjötinu, svo kæmi kannski Hagkaup með aðeins meira úrval af dýrari tegundum og ef til vill ein flott „exklúsíf“ lúxusvínbúð (Forseti hringir.) á höfuðborgarsvæðinu sem gerði út á þann markað. En þær yrðu fáar úti um land, hv. þingmaður, þær yrðu fáar úti um land.