fjárlög 2015.

Hæstv. forseti. Ég þakka hv. þingmanni gott svar. Ég trúi því að þar komi til sögu hreyfing og mataræði, ekki síst hjá börnum okkar og unglingum.

Þá langar mig að koma inn á hugmynd sem snýr að skólakerfinu. Við þurfum að auka hreyfinguna þar og huga að mataræðinu þar. Hermundur Sigmundsson, háskólaprófessor í Noregi, er með athyglisverða hugmyndafræði í þessu, tilraun sem hann er að gera í Flataskóla með að tengja saman bóknám og hreyfingu.

Ég vil spyrja hv. þingmann um skoðun hans á því, hvort við ættum ekki að fara í þessa vegferð frekar en í hreina neyslustýringu í gegnum skatta?