ungt fólk og fyrstu íbúðarkaup.
Virðulegi forseti. Ég þakka kærlega fyrir þessa mikilvægu umræðu. Margt gott hefur komið fram hérna. Það hefur sennilega aldrei verið mikilvægara en núna að við bjóðum ungu fólki upp á einhvers konar framtíðarsýn á það hvernig það geti komið sér þaki yfir höfuðið. Ég er sammála þeim sem hafa talað á undan um að þak yfir höfuðið þarf ekki endilega að vera séreignarþak, það getur verið leiguþak á leigumarkaði sem er öruggur. Unga fólkið í dag á nefnilega mjög auðvelt með framtíðarsýn sem takmarkast ekki við útlínur landsins. Maður heyrir það æ meira á ungu fólki að hugmyndin um að búa erlendis er fullkomlega eðlileg. Við erum að keppa við útlönd um unga fólkið.
Það hefur verið ákveðin tíska í einhverja áratugi á Íslandi að styrkja stöðu þeirra sem fyrir eru og okkur sem eldri erum á kostnað unga fólksins, reka kerfin okkar og efnahaginn á kostnað komandi kynslóða. Það gengur upp á meðan komandi kynslóðir hafa ekki annan kost en að taka við skuldunum og troða marvaðann, en þegar þær hafa möguleika til þess að koma sér hreinlega í burtu frá vitleysingunum erum við í vanda stödd.
Þegar ég var ungur upplifði ég að fólk í kringum mig var oft mjög reitt og því var heitt í hamsi í kringum þessa upplifun. Í dag upplifi ég að þessum sama hópi sem orðinn er miðaldra líkar ágætlega þegar við mokum milljörðum í svokallaðar skuldaleiðréttingar til þeirra sem eiga húsnæði. Þá mismunum við gagnvart þeim sem eiga eftir að eignast húsnæði eða komast inn á húsnæðismarkaðinn, (Forseti hringir.) fyrir utan það að við erum enn og aftur að byggja undir bólu (Forseti hringir.) á húsnæðisverði sem gerir kaupendum enn erfiðara að komast inn. Þetta er vítahringur sem við verðum að brjóta.
