frumvörp um húsnæðismál.
Hæstv. forseti. Ég ætla að halda áfram að fjalla um heimilin, þó með nokkuð öðrum hætti. Húsnæðismál eru meðal stóru málanna sem brenna á fólki. Það hefur líklega ekki farið fram hjá neinum sem hefur fylgst eitthvað með fjölmiðlum á síðustu mánuðum hve erfið staða er uppi á húsnæðismarkaði, ekki hvað síst hjá ungu fólki og fólki með lágar tekjur. Það er ekki ofsögum sagt, held ég, að beðið sé eftir boðaðri stefnu stjórnvalda í þessum efnum.
Í þingmálaskrá eru kynnt fjögur frumvörp frá hæstv. félags- og húsnæðismálaráðherra sem tengjast húsnæðismálum, tvö sem áttu að koma fram í haust og tvö sem áttu að koma fram núna í vor, en það bólar hins vegar ekkert á þeim enn.
Ég spyr því hæstv. félags- og húsnæðismálaráðherra hver staðan sé á þessum frumvörpum, hvort ráðherra ætli að leggja einhver þessara frumvarpa fram á þessu þingi og þá hver þeirra.