Evrópumál, munnleg skýrsla utanríkisráðherra.

Virðulegi forseti. Hv. þingmaður fór yfir klisjukenndustu rökin gegn ESB. Ég velti því svolítið fyrir mér hvort maður ætti að spyrja hvernig þetta komi okkur við fyrst þingið á ekkert að vera að ráða þessu á annað borð. En ég ætla að sleppa því og óska þess ekki að hv. þingmaður svari þeirri spurningu, ég ætla að fara betur út í það sjálfur í ræðu minni á eftir. Ég óska bara eftir andsvörum hv. þingmanns ef hann hefur eitthvað við það að athuga.

Hv. þingmaður fór einnig út í undanþágur og þá orðræðu að það séu engar varanlegar undanþágur frá ESB. Nú langar mig að spyrja hvort hv. þingmaður vilji þá meina að til dæmis Danmörk njóti ekki undanþágu á sviði innanríkis- og dómsmála og Danir séu ekki undanþegnir varnarmálastefnu Evrópusambandsins og standi ekki utan stefnu ESB í innflytjendamálum og málefnum hælisleitenda.