réttur samkynhneigðra karla til að gefa blóð.

Virðulegur forseti. Mig langar aðeins að ræða hérna þau sjálfsögðu mannréttindi að samkynhneigðir og tvíkynhneigðir karlmenn geti fengið að gefa blóð. Ég veit að ráðuneytið er að skoða þetta. Í síðustu viku fór ég að grennslast fyrir um málið. Með aðstoð nefndarritara sendum við fyrirspurn á ráðuneytið, en fyrst ráðherra er staddur hér í dag og ég hef aðgang að honum vil ég bara spyrja hann beint út í þetta mál.

Þessu er misjafnt farið eftir löndum. Við göngum langt á Íslandi en í mörgum löndum er núna verið að endurskoða þetta og í rauninni hætta að setja einhverjar svona reglur vegna þess að það eru ekki vísindaleg rök fyrir þessu lengur. Þessar reglur voru settar á upp úr 1980 þegar eyðnifaraldurinn var í algleymingi.

Ég mundi gjarnan vilja vita afstöðu ráðherra í þessu máli. Þetta snýr að ráðuneytinu og ráðherra en ekki Blóðbankanum eins og hefur kannski mátt skilja af umræðunni. Hver er staðan og hver er líka afstaða ráðherra?