áætlun um vernd og orkunýtingu landsvæða.
Herra forseti. Já, því er ég alveg sammála og þess vegna skyldi engan undra að við sem viljum standa vörð um náttúru landsins tökum þessum málatilbúnaði þunglega. Í fyrsta lagi er málsmeðferðin ónýt og málatilbúnaðurinn ónýtur og ekki boðlegur Alþingi. Í öðru lagi er ég að minnsta kosti djúpt og hjartanlega andvígur innihaldi tillögunnar, efni hennar, ég er á móti því að þessum kostum sé bætt inn í nýtingarflokk. Og í þriðja lagi lít ég á þetta sem hluta af miklu stærra stríði. Við skulum ekki gleyma því að við erum á þessum sama vetri að horfa framan í áform Landsnets um að fara með háspennulínu þvert yfir Sprengisand sem vill helst draga Vegagerðina á eftir sér með uppbyggðan veg. Það er sótt að náttúrunni á mörgum fleiri sviðum þannig að það er ástæða til að reisa rönd við og einhverjar raddir verður hún að eiga, móðir náttúra, á Alþingi og ég er þakklátur öllum þeim félögum sem vilja leggja henni lið.
