störf þingsins.
Virðulegur forseti. Allt of háir vextir eru eitt helsta vandamál heimila og fyrirtækja hér á landi. Það sem af er þessu kjörtímabili hafa raunvextir sem heimili og fyrirtæki í landinu þurfa að borga hækkað stöðugt.
Það kemur æ betur í ljós að rangar ákvarðanir stjórnarflokkanna um skattalækkanir á stórútgerðina, efnafólk í landinu og hátekjufólk í landinu hafa leitt til þess að vextir eru hærri hér en þeir hefðu ella þurft að vera. Seðlabankinn þarf að auka aðhaldið með vaxtastigi vegna þess að aðhaldið í ríkisfjármálum hefur verið minnkað og sköttum létt af þeim sem hafa það best.
Það er því full ástæða til að skora á ríkisstjórnina að endurskoða þessar aðgerðir vegna þess að við megum ekki lenda aftur í þeim vítahring vitleysunnar sem var hér í aðdraganda hrunsins þegar sömu stjórnmálaflokkar kepptust við að lækka skatta á forréttindastéttirnar í landinu meðan Seðlabankinn hinum megin götunnar kepptist við að hækka vexti á fólkið í landinu. Fólkið og fyrirtækin í landinu mega ekki við því að borga hærri vexti, en stórútgerðin, efnafólkið og hátekjufólkið má sannarlega við því að borga þá skatta sem það var að borga við síðustu kosningar.