alþjóðleg þróunarsamvinna Íslands o.fl.
Herra forseti. Já, það er nú þetta sem er gagnrýnt, það hefur komið fram gagnrýni frá aðilum eins og ASÍ til dæmis. Ég tel að sú gagnrýni sem kom þaðan á þessi mál hafi ekki verið rædd nógu vel í utanríkismálanefnd. Vissulega er í ráðuneytinu ákveðin þekking, en alltaf er hætta á því að aðrir hagsmunir fari að blandast saman eins og viðskiptahagsmunir. Hver er líka verkstjóri? Við vitum að forstöðumaður núverandi Þróunarsamvinnustofnunar er skipstjóri á sínu skipi og er verkstjóri yfir því hvernig farið er með þá fjármuni og hefur yfirsýn yfir það. En hvernig verður það í ráðuneytinu? Hver verður þar ábyrgðaraðili og heldur utan um að ekki sé verið að slaka á taumunum heldur að gefa í og berst fyrir fjármunum til þessa málaflokks?
Hæstv. ráðherra talaði hér áðan um að það yrði alveg nægt gagnsæi með því hvernig fjármunir skiptist, þeir sem koma inn í ráðuneytið, til þessa málaflokks og á hverjum fjárlagalið kæmi fram hve háir fjármunir væru til þess. En það er ekki nægjanlegt. Með því að hafa þetta í sjálfstæðri stofnun er miklu meiri slagkraftur til að vinna að því að ná meiri fjármunum inn í þessi brýnu verkefni og líka til að fylgja þeim faglega úr hlaði svo að þeir fjármunir nýtist sem best fyrir þá sem á þurfa að halda.