fjárlög 2016.
Virðulegi forseti. Ég held að það sé kergja út af þessu, akkúrat vegna þess að það er búið að halda röngum upplýsingum að fólki. Ég fullyrði að engin þjóð, í Evrópu eðli málsins samkvæmt, hafi haft stjórnmálamenn sem voga sér að blekkja fólk með þessum hætti. Allir vita hvað felst í því að vera í ESB. Við erum búin að gera mjög góðar úttektir á því. ESB er til og engin þjóð hefur sótt um aðild að ESB til að kanna hvað er í gangi. Íslenskir stjórnmálamenn og jafnvel menn í fræðasamfélaginu sem vilja fara í ESB halda því miskunnarlaust að fólki. Ég hvet ykkur til að reyna að útskýra fyrir útlendingi að við höfum sótt um aðild að ESB til að kanna hvað væri í boði. Það sem við gerðum var að við breyttum lögum, við fórum inn í rýniskýrsluna til að sjá hvað nákvæmlega væri tiltekið að við þyrftum að gera. Við þurftum að tímasetja hvernig við ætluðum að gera það til að fara í þetta ferli. Svo leyfa menn sér að koma hér upp — það er enginn vafi að þetta er kergja sem er komin til vegna þess (Forseti hringir.) að síðan er sagt við fólk: Það er verið að taka af þér ákveðinn rétt, það gera þeir stjórnmálamenn sem þora ekki að segja hvað felst í því að vera í ESB og segja þá af hverju þeir vilja ganga í ESB.
Það er umræða sem við skulum taka en ekki blekkja fólk með þeim hætti sem þið eruð að gera núna.