fjárlög 2016.
Hæstv. forseti. Ég þakka hv. þm. Helga Hrafni Gunnarssyni góða ræðu. Hv. þingmaður ræddi fjárlögin einkum eða að stórum hluta út frá ræðu hv. þm. Frosta Sigurjónssonar, sem vakti athygli fyrr í dag. Ég hlustaði á þá ræðu og það er eins og hv. þm. Steingrímur J. Sigfússon sagði, hv. þm. Frosti Sigurjónsson hugsar gjarnan út fyrir boxið og við búum sannarlega að því í þingflokki Framsóknar. Þetta er hollt og öllum gott.
Flestar hugmyndirnar sneru í kjarnanum að sparnaði, og lagði hv. þingmaður það skemmtilega fram, en sneru hins vegar að peningastefnu og peningastefnutengdum málum. Við erum jú alltaf að reyna að ná fram bættum lífskjörum í hagkerfinu og treystum á samspil peningastefnu og fjármálastefnu og fjárlögin snúa að þeirri hlið sem er fjármálastefnan.
Ég vil í fyrra andsvari spyrja hv. þingmann út í þá heimild sem lögð er til í 6. gr. fjárlaga, að ríkið hafi heimild, og ég ítreka heimild, til að selja hlut í Landsbankanum. Það er hafinn undirbúningur að því hjá Bankasýslunni og það skiptir auðvitað öllu máli þegar við metum það hversu mikill sparnaður getur orðið, í mínum huga, hvaða verði er verið að tala út frá, hvaða verð sé mögulegt að fá fyrir þann 30% hlut sem mögulega yrði seldur.
Ég spyr hv. þingmann út í þær hugmyndir og hvaða hugmyndir hv. þingmaður hefur um að selja bankann eða ekki, þ.e. 30% hlut.