störf þingsins.
Hæstv. forseti. Ég vil taka undir með hv. 1. þm. Norðaust. sem sagði áðan að hann segði unglingunum sínum sem hann kenndi að hann héldi að þau hefðu það hvað best hér á jörðinni. Þetta er nákvæmlega það sem ég sagði við hv. þingmann þegar ég kenndi honum á árum áður. Það er ánægjulegt að sjá hvernig skilaboðin berast áfram.
Á eftir munum við væntanlega samþykka stefnu og aðgerðaáætlun í geðheilbrigðismálum til næstu fjögurra ára og er það vel. Ég vil hins vegar benda á að einn hópur sérstaklega, sem ég hef haft mikið saman við að sælda, á oft erfitt uppdráttar og það eru unglingar í framhaldsskólum landsins. Nú er staðan sú og hefur komið fram að allt að 5% einstaklinga eru með svonefnda ADHD-röskun. Það má alveg fullyrða að hátt í 10% ungs fólks í framhaldsskólum glími við ýmiss konar geðraskanir. Þess vegna tel ég afskaplega mikilvægt að menntamálaráðuneytið og velferðar- og heilbrigðisráðuneytið taki höndum saman og útfæri stefnu um vinnu með þetta unga fólk. Það skiptir okkur máli að eiga sem flesta heilbrigða einstaklinga í samfélagi okkar. Við þurfum á hverri einustu vinnandi hönd að halda þegar til kastanna kemur. Eins og forfeður okkar sögðu: Heilbrigð sál í hraustum líkama. Það er það sem við eigum öll að stefna að.
Tengd mál
- Stefna og aðgerðaáætlun í geðheilbrigðismálum til fjögurra ára, 338. mál, þingsályktunartillaga.
