rannsókn á aflandsfélögum Íslendinga og skattundanskotum.
Virðulegi forseti. Ég þakka hv. þingmanni fyrir ræðuna.
Hv. þingmaður nefnir, sem ég held að sé alveg hárrétt hjá honum, að það skiptir máli að byggja upp traust. Grundvallaratriðið í því er að við leggjum hlutina fram á réttan hátt og snúum ekki út úr eða erum með hálfsannleik eða annað slíkt.
Mér finnst það vera frétt ef þessi þingsályktunartillaga gengur út á hæstv. fjármála- og efnahagsráðherra. Ég hélt að þetta væri miklu stærra mál en svo. Hv. þingmaður vísaði einnig í þingsvar sem kom í tíð ríkisstjórnar sem Sjálfstæðisflokkurinn átti aðild að. Þá var vísað í að ekki væri hagur í því fyrir íslensk félög að fara annað vegna þess að skatthlutföllin væru svo lág. Má vera að það hafi verið rétt. Ég fer betur yfir það í minni ræðu. Hv. þingmaður talar um að þetta sé fyrst og fremst gert til að fela, þ.e. að fara í aflandsfélög. Það má vera rétt. Ég fer betur yfir þau mál í ræðu minni á eftir. En ég held að við viljum ekki sjá hagkerfi eða efnahagslíf þar sem menn gera slíkt, að fela hluti.
Ég vil því spyrja hv. þingmann vegna þess að Píratar eru í meiri hlutanum í Reykjavíkurborg. Undir forustu Pírata og þess meiri hluta sem er núna fór Orkuveitan í að stofna aflandsfélag. Mér finnst skipta máli að menn tali þá bara hreint um það af hverju menn fóru í það ef þetta er bara gert til að fela.
Hv. þingmaður þekkir þessi mál vel. Ég þarf ekki að rifja upp þá sögu. Þetta hefur verið mikið í umræðunni. Ég vil spyrja: Var það þannig að Píratar tækju þátt í því, ásamt Vinstri grænum og Samfylkingunni, að fela eignir eða annað slíkt með því að stofna félag á vegum Orkuveitunnar í aflandsfélagi?