samningur milli Íslands og Færeyja um fiskveiðar innan íslenskrar og færeyskrar lögsögu 2016.

Herra forseti. Ég hafði fyrirvara við stuðning minn við þetta mál en tókst ekki að gera grein fyrir honum við umræðu málsins. Í þeim samningi sem við erum hér að ganga frá er fallist á fyrir Íslands hönd að kvóti Færeyinga í þorski verði aukinn um helming.

Nú vil ég Færeyingum ekkert nema gott. Hins vegar er það svo að við höfum átt í erfiðri deilu við þá um makríl og ríkisstjórnin fór mjög hörðum orðum um það úr þessum stóli. Við erum sömuleiðis í uppnámi gagnvart þeim með mál sem tengjast kolmunna og síld.

Við þær aðstæður finnst mér það vera undarleg samningatækni að verðlauna Færeyinga með því að stórauka kvóta þeirra í þorski. Ég gekk eftir því við umræður málsins í utanríkismálanefnd hvað lægi þar á bak við. Það komu engar skýringar.

Það breytir því ekki að ég ætla að styðja þetta mál. En mér finnst sem samningatækni íslensku ríkisstjórnarinnar í þessu máli sé ekki til fyrirmyndar.