þjónusta við börn með geðvanda eða fjölþættan vanda.

Virðulegi forseti. Ég þakka umræðuna og þær athugasemdir sem hafa verið bornar fram. Ég þakka sömuleiðis hv. málshefjanda upptakt hans og brennandi áhuga á málaflokknum. Þetta er ekki í fyrsta skiptið sem við eigum orðastað, ég og hv. þm. Páll Valur Björnsson, um þessi efni og ég kann afskaplega vel að meta það þann áhuga sem hv. þingmaður hefur á þessum hluta heilbrigðismálanna. Ég kýs að skilja samþykki þingsins á geðheilbrigðisstefnu hér fyrir ekki löngu síðan, sem varð til á grundvelli þingsályktunartillögu sem þingmenn báru fram undir forustu hv. þm. Sigríðar Ingibjargar Ingadóttur, ég kýs að túlka þá niðurstöðu sem birtist síðan í afgreiðslu þingsins á geðheilbrigðisstefnunni til næstu ára sem áherslu í þá veru að setja þennan málaflokk í forgang. Ég fagna því mjög. Það verður alltaf, eðlilega og eðli málsins samkvæmt, unnt að kalla eftir upplýsingum eða tillögum til frekari úrbóta o.s.frv. en ég lít svo á að við höfum stigið mjög merkilegt skref. Við erum að fikra okkur inn í annan veruleika. Þessum málum hefur aldrei fyrr í sögu okkar verið skipað í einhvern einn ákveðinn farveg og þegar þessi grunnur er kominn er svo gott að geta byggt ofan á hann og bætt við á þeim sviðum þar sem við stöndum hvað veikast fyrir.

Ég fagna enn og aftur umræðuna og skynja að það er mikill vilji þingsins til að taka á í þessum efnum.