áætlun um vernd og orkunýtingu landsvæða.

Virðulegi forseti. Ég tek undir með hv. þingmanni, að mörgu leyti hefur verið ágætlega að verki staðið og faglega unnið að þessu. Ég vildi eingöngu spyrja hv. þingmann út í þetta af því að við sátum saman á fundi um þetta. Hv. þingmaður segist ekki hafa skilið orð verkefnisstjóra þannig að ferlið hafi ekki verið í anda laganna. Mig langar að spyrja hv. þingmann að ef hann fengi það staðfest að verkefnisstjóri teldi að svo hefði verið, myndi það breyta einhverju um skoðun hans á því að vinnubrögð hefðu verið fagleg og að þetta hefði verið nógu ítarleg vinna?

Ég virði það við hv. þingmann að vilja ekki fara út í einstaka virkjunarkosti enda væri það löng umræða. Ég gat ekki betur skilið hér áðan en að við ættum mikla vinnu fyrir höndum í hv. umhverfis- og samgöngunefnd við að rýna með stækkunargleri ofan í hvern einasta kost, en hefur hv. þingmaður, sitjandi í umhverfis- og samgöngunefnd, einhverjar áhyggjur af þeim varnaðarorðum sem hér hefur aðeins verið komið inn á í dag t.d. varðandi villta laxastofninn í Þjórsá? Það kom fram í máli hæstv. ráðherra að ekki væri enn ljóst hverjar mótvægisaðgerðirnar yrðu, hvernig því yrði komið við, heldur myndi það koma fram við framkvæmdaleyfi.