orð fjármálaráðherra um Alþingi, dagskrá þingsins o.fl.
Frú forseti. Ég tek undir með hv. þm. Svandísi Svavarsdóttur, þingflokksformanni Vinstri grænna, og fleirum sem hafa talað hér um áhyggjur af ummælum hæstv. fjármála- og efnahagsráðherra undanfarið um þingið. Margir hafa það á tilfinningunni að ýmislegt sé að breytast til verri vegar í íslensku samfélagi og hallast meira að því eins og það var hér fyrir hrun. Eitt af því sem var gagnrýnt í skýrslu rannsóknarnefndar Alþingis og í þingmannaskýrslunni líka sem vann úr skýrslu rannsóknarnefndarinnar var ráðherraræði, það þurfti að efla þingið gagnvart framkvæmdarvaldinu. Þegar hæstv. fjármála- og efnahagsráðherra segir að þing sé stjórnlaust þegar engin ríkisstjórn er með meiri hluta í þinginu fer aðeins um mann. Ég vil spyrja hæstv. ráðherra og ítreka spurningar sem fram hafa komið hér áður: Hefur forseti rætt þessi mál við hæstv. fjármála- og efnahagsráðherra ?