framtíðarsýn fyrir skapandi greinar.

Hæstv. forseti. Ég vil eins og fleiri þakka hv. þm. Katrínu Jakobsdóttur fyrir að hefja þessa umræðu.

Staðan er þessi: Við erum á barmi nýrrar iðnbyltingar. Við vitum að atvinnulíf framtíðarinnar verður ólíkt því sem það er í dag, þ.e. róbótavæðing og gervigreind. Þess vegna verðum við að velta fyrir okkur og taka ákvarðanir sem fyrst um hvaða hlutverk við ætlum að spila. Ætlum við að vera notendur nýrrar tækni eða ætlum við að skapa hana? Ætlum við að hlúa að fyrirtækjum sem starfa við skapandi greinar eður ei? Það er spurningin, hæstv. ráðherra.

Með því að skapa hana búum við til tekjur fyrir Ísland til framtíðar, ekki bara með tekjuskatti vegna þeirra starfa sem skapast heldur líka með tekjum af vörum sem við seljum á alþjóðlegum mörkuðum.

Ný lög sem sett voru á síðasta ári eru góð og gild en þau eru takmörkuð þar sem skattaívilnandi þakið er of lágt. Í Bretlandi t.d. er ekkert þak á skattaívilnanir til þróunarverkefna hjá skapandi fyrirtækjum eins og t.d. Marel og CCP og fleiri slíkum.

Ef við ætlum að vera samkeppnishæf verðum við að beita sértækum aðgerðum og stuðningi þar sem gengissveiflur eru íslenskum fyrirtækjum erfiðar, við erum langt frá mörkuðum og það er oft erfitt að fá hingað hæft starfsfólk. Lagaumhverfið í dag hamlar vexti stærri nýsköpunarfyrirtækja, eins og ég nefndi áðan og tók dæmi um Marel og CCP, og við það verður ekki búið.

Að því sögðu vil ég spyrja hæstv. ráðherra: Mun hann beita sér fyrir því að gerð verði sérstök greining á áhrifum þess að fara bresku leiðina hvað varðar skattaívilnanir? Það væri áhugavert að fá svar við því.

Það er mín skoðun að ef við förum ekki þá leið verði róðurinn of þungur fyrir íslensk nýsköpunarfyrirtæki og þau muni sitja eftir í alþjóðlegri samkeppni. Ríkissjóður verður þá af miklum tekjum. Við eigum ekki að líta á skattaívilnanir sem kostnað heldur leið til þess að auka tekjur okkar til framtíðar.