fjármálaráð og fjármálaáætlun.
Frú forseti. Við erum búin að afgreiða fjármálastefnuna til næstu fimm ára og þar voru gerðar athugasemdir af hálfu fjármálaráðs sem voru hunsaðar. Þær koma sumar aftur fram í umsögn ráðsins um fjármálaáætlunina og þá er spurning hvort það eigi líka að hunsa það því að það er hægt að gera breytingar á milli umræðna. Maður vonast sannarlega til að það verði gert vegna þess að þegar lögin voru sett um fjármálaráðið var þess vænst að það myndi stuðla að auknum aga í fjármálum hins opinbera í niðursveiflu og á góðæristímum. En til þess að svo megi verða verður að fara eftir ábendingum ráðsins. Fjármálaráðið gagnrýnir m.a. að það eigi að lækka almenna virðisaukaskattsþrepið á áætlunartímanum.
Ég spyr hæstv. ráðherra hvort sú gagnrýni sé ekki réttmæt og hvort það sé ekki rétt að sagan hafi sýnt að lækkun skatta á þenslutímum hafi (Forseti hringir.) slæmar afleiðingar á hag almennings. Ég vitna hér í söguna ef hin faglegu rök fjármálaráðs duga ekki fyrir hæstv. ráðherra.