breyting á ýmsum lögum vegna fjárlaga 2018.
Virðulegur forseti. Ég þakka hv. þm. Þorsteini Víglundssyni fyrir ræðu hans. Ein spurning sem kom upp undir ræðunni. Hv. þingmaður talaði um tillögu sína að hækkun fjármagnstekjuskatts úr 20 í 22% verði frestað vegna þess að, ef svo má segja, mótleggurinn er ekki tilbúinn, ekki er búið að útfæra þær tillögur sem tilkynnt hefur verið að komi fram varðandi breytingu á gjaldstofninum. Nú er hv. þingmaður fulltrúi í efnahags- og viðskiptanefnd. Var þetta rætt í nefndinni og hverjar voru viðtökur annarra nefndarmanna við þessari nálgun hv. þingmanns, ef hann lýsti þeim í nefndinni? Ég hef heyrt hv. þingmann tala áður með þessum hætti hér þingsal. Sjálfur lagði ég þetta til í umræðu um fjárlög. Mér leikur forvitni á að vita með hvaða hætti umræður hafa spunnist sérstaklega hvað varðar þetta atriði.