hagkvæmnisathugun á uppbyggingu Skógarstrandarvegar.

Herra forseti. Verður maður ekki að vera bjartsýnn, er það ekki það sem allir vilja leggja upp með? Auðvitað vildi ég gjarnan að þessi þingsályktunartillaga um þennan afmarkaða veg færi í hagkvæmnisathugun og fengi umfjöllun út frá þeim sjónarmiðum sem flutningsmaður dregur fram í þessari fínu greinargerð. En ég vil taka málið enn lengra. Það eru vegir vítt og breitt um landið sem eru orðnir eftirbátar nútímasamfélags á 21. öld.

Við getum tekið það til okkar, við öll hér inni og þingmenn fyrri kjörtímabila, að það er ekki í því lagi sem það á að vera. Það á ekki að hengja neinn fyrir það sérstaklega. Þetta hefur bara ekki verið í lagi. Við verðum að taka okkur tak. Við erum að taka okkur tak varðandi t.d. uppbyggingu háhraðatenginga. Við erum að taka á varðandi uppbyggingu flutningskerfis og endurnýjun á flutningskerfi í landinu og auka þátt jarðstrengja í þeim efnum.

Vegakerfið er bara ekki í lagi. Það er auðvitað orðin mikil þörf á viðhaldi á fjölförnum vegum hér út frá höfuðborgarsvæðinu. Það kallar á mikla fjármuni. En það má ekki gleymast að þessir vegir, þessi vegarkafli, eru malarvegir með djúpum holum. Eins og þingmaður sem var hér á síðasta eða þarsíðasta kjörtímabili nefndi eru þetta verri vegir en eru í Kákasusfjöllunum. Það er bara þannig.

Ég held að við öll, hvar í flokki sem við stöndum, eigum að horfa til þessara vegakafla og færa þá upp á 21. öldina og forgangsraða í þágu þeirra meðfram því sem við þurfum að styrkja flutningskerfið út frá höfuðborgarsvæðinu og tvöfalda vegi eins og Vesturlandsveg og á Suðurlandi.