lestrarvandi og aðgerðir til að sporna gegn honum.
Virðulegi forseti. Hvað þurfum við að læra? Þegar allt kemur til alls þurfum við bara að geta skilið aðra og gert okkur skiljanleg öðrum. Það er ekkert sjálfsagt eða auðvelt verkefni. Tungumálið er mjög margslungið verkfæri þar sem skilningur frá munni til eyra getur bjagast mjög mikið, sama hversu stutt vegalengdin er. En einnig eru tungumálin sem við þurfum að gera okkur skiljanleg á eða skilja mjög mörg. Það eru ekki bara hefðbundin tungumál heldur líka sérhæfð mál, t.d. stærðfræði eða forritun og myndmál og ýmislegt annað. Þar skiptir æfingin öllu máli. Því meiri æfing, þeim mun meiri skilningur, bæði við að gera okkur sjálf skiljanleg og skilja aðra.
Aðalnámskrá leggur einmitt mikla áherslu á læsi, sem er ein af sex grunnstoðum náms ásamt sjálfbærni, lýðræði og mannréttindum, jafnrétti, heilbrigði og velferð og að lokum sköpun. Þar er læsi skilgreint í mjög víðum skilningi, t.d. upplýsingalæsi, miðlalæsi, fjármálalæsi o.s.frv. Það er lagður gríðarlega mikill tími í öll þessi atriði. Við fáum svo mörg verkefni sem krefjast svo rosalega breiðs þekkingarvettvangs hjá okkur að við höfum í raun orðið mjög lítinn tíma til að sinna þeim öllum. Þetta er ekki lengur bara bókin, þetta er líka tölvan, líka sjónvarpið og miðillinn og útvarpið. Þetta er einfaldlega keppni um tíma, keppni um hæfileika í mörgum tungumálum, mjög mörgum. Það gerir okkur einfaldlega erfitt fyrir.
En það er algerlega nauðsynlegt að vita af vandanum og fylgjast með lykilatriðunum hérna sem er að sjálfsögðu það að geta gert okkur skiljanleg á okkar fyrsta tungumáli og skilið aðra.