148. löggjafarþing — 65. fundur,  31. maí 2018.

samkomulag um lok þingstarfa.

[12:22]
Horfa

Hanna Katrín Friðriksson (V):

Herra forseti. Ég ætla að taka undir skilning annarra þingflokksformanna stjórnarandstöðunnar; það var ekki með þessum hætti sem við ræddum um dagskrána fram undan, að þingmannamál í bullandi ágreiningi væru tekin fram fyrir í röðinni.

Það er alveg rétt að þetta er stórt mál sem þarfnast umræðu. Það er hins vegar líka rétt að ekkert samkomulag hefur náðst um þinglok og meðan það er ekki fyrir hendi erum við að tala um að þrír þingdagar séu eftir og mörg önnur mál í farvatninu sem ríkisstjórnin hefur trassað að setja á dagskrá og þarfnast mikillar umræðu. Við heyrum af því að stjórnarþingmenn séu að ræða það að þinghald verði lengt, jafnvel fram undir miðjan mánuð. Þessu er jafnvel kastað fram á nefndarfundum í samræðum við gesti. Ég spyr: Hvaðan hafa þeir þessar upplýsingar?

Það er kannski ekki úr vegi að spyrja, úr því við vorum hér fyrr í vikunni að ræða mál, stórt mál, sem þinginu var ekki kynnt en kom fram á samráðsvettvangi: Er upplýsingar um þinglok kannski þar að finna? Eiga þingmenn að fara þangað og leita að þessum upplýsingum, þingmenn stjórnarandstöðunnar?